domingo, 20 de maio de 2018

21 Días En Galego na Cadea SER




21DEG segue a dar voltas, como unha buxaina que se resiste a deixar de xirar. Desta vez, tocounos visitar a Cadea Ser. Tivemos a sorte de ser convidados ao programa «O Coruñés Opina», un clásico da radio coruñesa, conducido por Isabel Bravo. 

Este domingo, o faladoiro xiraba arredor da situación da lingua galega, especialmente entre a xente nova. En nome da rapazada de 21 Días En Galego acudiron Lucía Costa (de 3ESO) e Lía Lema e Diego Oreona (de 4ESO). Todos tiveron a oportunidade de achegar á animada conversa as súas ideas e propostas sopre a cuestión.

Aquí tedes os podcast coas dúas horas íntegras de programa.



Foi unha experiencia fantástica! O ano que vén, máis. E mentres, a falar todo o galego que poidades!

mércores, 9 de maio de 2018

O Fogar homenaxeado na Real Academia Galega


Na mañá de onte, día 8 de maio, o Fogar visitou a Real Academia Galega. Mais desta vez non foi para facer unha visita guiada ás súas instalacións (aínda que ao final tamén a fixésemos). Desta vez iamos convidados pola máxima institución da lingua do país!

Os académicos quixeron celebrar un acto no que se recoñecese e se axudase a divulgar o proxecto 21 DÍAS EN GALEGO, que desde hai dous anos estamos a levar adiante no noso centro. Compartiamos esta homenaxe coa xente do IES da Pobra o Caramiñal, pionerios na experiencia.

O acto foi redondo! Primeiro presentación inicial do presidente Víctor Freixanes, que aló atrás xa nos dedicara unhas eloxiosas palabras en La Voz de Galicia. Logo unhas breves intervencións por parte de Pilar Ponte e de Carlos Medrano, profesores que coordinaron as actividades nos dous centros e un fantástico vídeo resumo elaborado polo noso compañeiro de bacharelato Diego Pampín.


Deseguido, chegou o momento das intervencións dos alumnos e alumnas, a xente nova que a Academia adoecía por recibir e escoitar. En nome do Fogar, falaron Diego Oreona Pena e Lía Lema Pombo. Contaron como viviron a experiencia 21 DÍAS e como ven o presente e o futuro da lingua. E deixaron o pavillón do cole ben alto!


Finalmente, chegou o momento do coloquio e da rolda de prensa. Aí moitos outros rapaces, e tamén académicos, tiveron a oportunidade charlar de forma animada sobre distintas cuestións referidas ao proxecto e tamén á delicada situación da nosa lingua.



Con nós, a RAG inicia un ciclo que chamará «Encontros da Academia coa xente nova». O seu obxectivo é dar voz á mocidade, desde estudantes a profesionais, abrindo espazos para a reflexión e o debate sobre o presente e o futuro do galego.

Por último, fixemos unha rápida visita á Academia e unha foto de grupo para deixar constancia gráfica dun día histórico. Se cadra, como alguén xa comentou, van ter que ir deixando algunha cadeira dispoñible para os «novos académicos» que xa están a chamar a porta.

Para saberdes máis podedes, aquí podedes ver como recolleu o acontecemento o portal Real Academia Galega. E aquí, aquí, aquí e aquí, a nova noutros medios.

sábado, 28 de abril de 2018

E chegamos á Academia!


As cousas sábese como comezan, mais rara vez como van acabar. O curso pasado, durante algunha das sesións da materia de Lingua Galega, tratando o bloque de sociolingüística, mencionamos a experiencia dos 21 DÍAS CO GALEGO do IES da Pobra do Caramiñal e algúns dos alumnos e alumnas falaron de por que non faciamos nós algo semellante. E aí comezou todo no Fogar. 

Hoxe, despois de dúas edicións do noso 21 DÍAS EN GALEGO, estamos de felicitación. Se o verán pasado foi a Asociación Xermolos a que nos agasallou co premio á «Investigación sobre a nosa fala», recibido no Festival de Pardiñas, este vindeiro 8 de maio é nada máis e nada menos que a Real Academia Galega a que nos convida, xunto coa xente da Pobra, a un acto de recoñecemento público. Alí estarán, ademais, os medios de comunicación!

Parabéns a todos os rapaces e rapazas que coa vosa ilusión e dedicación fixestes posible este proxecto tan fermoso. E que siga a medrar!

luns, 23 de abril de 2018

[21 DEG: Día 21] Como che vai?


Festa rachada! Deches completado o desafío de 21 Días En Galego 2018! Seguro que non foi doado. Con todo, o importante é que a cousa non acabe aquí. O futuro da lingua, como xa podes imaxinar, depende de todos e cada un de nós. Da actitude que teñamos ante ela, do uso que fagamos dela.

Fosen cales fosen as túas motivacións en 21DEG, o importante é que mellorases a túa expresión oral en galego e, á vez, que puideses reflexionar e formarte unha opinión sobre a situación a nosa lingua. Os seguintes vídeos (o segundo de alumnas do Fogar) pretenden axudarche a reflexionar sobre o feito de que o futuro da lingua depende directamente de ti. A cousa non pode quedar en 21 días! Parabéns e ánimo!



E agora, as últimas reflexións sobre «Como che vai?»
—Como o levaches hoxe? Como ves a evolución da túa lingua oral?
—Que opinas dos vídeos de hoxe? E da idea de que «O futuro da lingua galega depende de ti»?
—Que sentes despois de completar o día 21? Implicouse a xente que te rodea?
—Que é o que máis che gustou da experiencia? E o que menos?
—Animarías a outros compañeiros a repetir o ano que vén? Por que? Como?
Ah! E dentro duns días, case con seguridade, SORPRESA FINAL!

domingo, 22 de abril de 2018

[21 DEG: Día 20] O reto: Nin si nin non


Hoxe, día 20 de 21DEG, «O reto» é un xogo de lingua oral que xa probamos o curso pasado: «Nin si, nin non». Xa sabedes, un enredo divertido para xogar en parellas. Por susposto, debedes gravalo en vídeo. Aproveitando que é fin de semana, seguro que che é máis doado facelo con amigos ou coa familia.


• Xúntate con alguén, preferiblemente, un compañeiro/a de «21 Días En Galego».
• Un de vós fai preguntas e o outro responde.
• Poden ser de calquera tema. A única norma fundamental é que non se pode reponder nin «si» nin «non». E tampouco permanecer en silencio, obviamente.
• Cando se diga «si» ou «non», pérdese e trócanse os papeis. Quen preguntaba, responde; e quen respondía, pregunta.
• Así sucesivamente ata cumprir os 3 minutos. Gravade o xogo sen cortes.


Zoé Vázquez Martínez, 3ESOC

sábado, 21 de abril de 2018

[21 DEG: Día 19] Como che vai?


Deseguido, un vídeo da Mesa pola Normalización Lingüística inspirado na serie de televisión británica Black Mirror. A protagonista é Raquel Prado Gómez, que se presta a participar dun experimento. De momento, non contaremos nada máis. 


Como vedes, a curtametraxe pretende axudarnos a reflexionar sobre as dificultades reais que atopa calquera persoa para desenvolver por enteiro a túa vida en galego, con normalidade.

Toca falar sobre «Como che vai»?
—Que tal foi hoxe? Que fixeches? E o teu galego?
—Veste con ánimos para acabar os 21DEG? Ves algún cambio na túa actitude ante o galego?
—Que pensas da curtametraxe anterior?
—Cres que é doado desenvolver unha vida totalmente en galego con normalidade? E en castelán?
—Nestes días de 21DEG experimentaches algo parecido ao que viviu a protagonista? En que momentos?

Xiana Domínguez Area, 3ESOA

venres, 20 de abril de 2018

[21 DEG: Día 18] O reto: Pasagalego


A febre do Pasagalego vaise estendendo. A xente do IES da Pobra fixeron os primeiros, no Fogar tamén nos apuntamos e agora aparece estoutro do CEP Salustiano Rey Eiras, tamén da Pobra. Por certo, desta vez temático! Seguro que o virus do Pasagalego seguirá a se espallar por Internet.


Xa sabes cal é o reto de hoxe. Tócache xogar a resolvelo. Escóitao con calma e vai gravando as túas respostas. Podes pausar o vídeo as veces que o precises. A ver cantas palabras da rosca dás acertado.

Adiante co Pasagalego! E graciñas aos rapaces do CEP Salustiano Rey Eiras!

Sergio Castro García, 3ESOA